TLAWMNGAIHNA LEH KAN NUN

Tlawmngaihna tih thumal hi Mizotawnga mawi ber pawl a ni a, a awmzia pawh mi hrang hrangin an hrilhfiah dan a inanglo hle hlawm anih hi. Keima lama a chianve dan ber chu, "thlarau rah, mahni nawmsakna tur pawh dawn phal lova midangte tana inpekna" ni berin ka hria. Inngaihtlawmna tih nen pawh hian a awmzia a inzul viau awm e. Inngaihtlawmna tello chuan tlawmngaihna hi a khingbai a, a kal thei lo. Mi tlawngaite zar zo tawh te pawh hian a awmzia an hrilhfiah thiam chuang bik lo. Hrilhfiah thiam phak loh khawp a ropui anih avang hian hiatfiah a ngai a, hrefiah tur chuan mahni ngei tlawmngaih a ngai ani



Mizote hi hnam tlawmngai kan ni em?

He zawhna tamtak chhanna chu "Ni e" tih a ni. A diklo tih ngam ni hek suh. Hmanlai kan pipute hunlai atang tawhin pasaltha Vana Pa te, Khuangchera te, Taitesena te leh midang tamtakte zarah a hnam pum ang huapin tlawmngai kan inti thin. Hnamdangte laka kan inchhuanna ber pawh he tlawmngaihna hi ani lawmni kha? YMA in theihtawp chhuah a tlawmngaihna chawivul an tum hnu phei hi chuan a vul pawh a vul nasa rawh e. kan tlawmngaihna field hi a inang hlawm lova. Khawharin riah peih deuh te hi thlanlaih peih tak anni kherlo thei a, puanpho seng peih tak te pawh hi ramkang thelh nikhua a a kal hmasa ah an tang kherlo thei bawk. Chuti anih takah chuan tlawmngaihna hi engtin nge kan lo teh ve thin tih hi a pawimawh ta anih ber mai chu



Hmanah chuan maw.......

Vana Pa chuan a nunna atan a hlauhawm thei ani tih hrereng chungin khaw hmawr berah nunaute himna anih dawn chuan a cheng ngam a, a thiante riltama an awm laiin amah in theipui rah a intlan puar duh hek lo. Taitesena te, Chawngbawla te leh Khuangchera te pawh pasaltha, mi tlawmngai a chhiar an ni. Mizo tlangval chuan zan thimtham leh ruahsur hnuaiah pawh nise amah in a zualko mai thin a, sa tla leh sahliam um a ngaih pawhin thiante pun buai lovin a tlan mai thin. Harsatna avangin khawtlangah a huna lo zo ve theilo te pawh an lo awm thei a, chutiang ah pawh khawtlang tangrualin an khaichhuak mai zel. Lal in a khua leh tuite thatna tur chauh in ro a rel thin a, rethei leh pachhiate dawmkangin thubuai hlabuai ah pawh duhsak bik leh thlei bik nei lovin lai takin thu an la thin a nih kha. "Nupui fanaute riltama an awm lai a mi buh ru ngamlo chu Pa ni tlak a nilo" tih thu hian midangte tana an inpekna thukzia a tarlang chiang hle

Damlo leh mitthi ruang zawn a ngaih tumin khawtlang an tangrual a, sahliam um leh ramkang thelh, ralbeih thuhla ah te pawh an inthurual em em. Tam tlak kum leh eikhawp thar loh kum a lo thlenin Lal ngeiin khaw thenawmah vehbur a khawn thin. Lovah leh sairamchhuah tum ah pawh tlangval tlawmngaite hming a langsar thin a nih kha. Mi tlawmngai chuan NOPUI an dawm a, a la dawm ve lo te pawhin itsik leh thik ahnekin an lawmpui a, dawm pha ve nih tumin tan an la sauh sauh zawk thin. Heng zawng zawng hi tlawmngaihna thiltih vek a ni.



Tunah erawh chuan.......

Hun leh kum a danglam a, hmanlai leh tunlai hun chu khaikhin chi a ni tawh lo. Zualko tura ruahsur hnuaia tlan a ngai tawh lova, damlo mitthi ruang pawh zawn mup mup a ngai tawh lo. Lal thuneihna a tawp tawh a, pasaltha ni tur pawh in huaisen leh tlawmngaih kher a ngai tawh lo, sum neih a tawk. Tu te emaw in cassete leh lehkhabu an tlangzarh tum a manto uchuak taka lo leisak thei te chu mi tlawmngai a chhiar an ni a, a thei ve lo leh leina tur nei ve lo te chu anni aia tlawmngailo deuh hlek a ngaih an ni. Tu pa in emaw a eirukin motor a lei a, chu a motor chu khawdanga damlo leh mitthi ruang phurh nan a hmantir chuan, a eiruk zawng zawng theihnghilh in mi tlawmngai theihtawpa chhiar a ni a, a nei ve lo te erawh an ni aia tlawmngailo deuh hlek bik a chhiar an ni

Orphanage leh eng group emaw tan a a ram neih tawl hmun sawma pakhat pe theitu chu tunlaiah chuan mi tlawmngai a ni tawh a. Chutih laiin ram nei ve lo, rim taka hah thikula mi hnuaia inhlawhfa thin chu mi tlawmngai a chhiartel a ni ngai mang lo. A eiruk atanga a neih tih hriat reng, sum tam tham tak sawma pakhat atan a petu chu ringtu tha, Pathian leh kohhran tana mi tangkai leh tlawmngai thei a chhiar a ni a, chutih laiin Sunday tuka thawhlawm thawh tur a neihloh avang leh kohhranin budget a tuksak a pek theih loh avang a Biakin pan hrehtu te chu mi uikawm leh kohhran member pawh ni ve tlaklo ang hial a ngaih an ni. A biakbuk thianghlima mi rethei tawngtaina chu mihausate thawhlawm thlak riin a chhilh zo ta anih hi.

Kan sawikual thui ta, a tawp nan aw. He Mizo hnam naupang tak hian hnam ropui a dinchhuah ve tum in ke kan pen mek a. Chuta kan kal pah chuan he tlawmngaihna par hi kan thlauhthla tial tial a ni. Midangte tana inpek tihvel ai chuan "Every man for himself" tih thupui kan changchawi tawh zawk a. Mahni bank account ngaihtuah ran chungin ram leh khawtlang kan vei a. Vai nundan kan luhchilh a, sap nundan chu banphak ve tumin kan dingdihlip awk awk a nih hi. Hetianga kan kal reng a Mizo min ti Mizo tu ber TLAWMNGAIHNA hi sirah kan hnawl zel a nih chuan, hun reilote ah Mizo hnam chu hnambo kan la ni thuai ang le......




"Ka chawi ang che sakhming hluanin
Zonunparmawi ka ti ang che...
.
.
.
.
.
.
Kum sang tamtak pawh ral mahse
Zamual liam lovin ding reng rawh"

Trust in God

I asked for Strength.........
And God gave me Difficulties to make me strong.


I asked for Wisdom.........
And God gave me Problems to solve.


I asked for Prosperity.........
And God gave me Brain and Brawn to work.


I asked for Courage.........
And God gave me Danger to overcome.


I asked for Love.........
And God gave me Troubled people to help.


I asked for Favors.........
And God gave me Opportunities.


I received nothing I wanted........
I received everything I needed!

KEIMAH EM NI?

Matthaia 26:20-22 kan chhiar chuan, Lal Isua leh a zirtirten Kalhlen Kût chaw an kilho laiin Isua'n a zirtirte mak tih kumkhua tur thu rawn sawi phutin, "Tih takmeuhin ka hrilh a che u, in zinga mi pakhat hian mi mantir ang" a han ti phut mai a!!!

Chu thu thinthawng chuan a han den chiah chuan, a sur a sa hnuaia an lo zui, a thim a var pawh thlulo leh hrehawm tinreng an lo tawrh phah tawhna an hotupa, a thiltihtheihzia lah an hriat chian em emin chu thu a han sawi ta mai chu an tan chuan a mak a, awih har tak anih rualin awihloh theihloh a ni bawk si. Puitling ta nafam chuan phatsantu dinhmuna din chauh loh chuan mahni hotupa mantir ngawt chu thil theihah ruat lovin leh a tua ber nge tih an hotupa chuan a sawi lan bawk si loh avangin mangang takin, "Lalpa, keimah em ni?" tiin an zawt ta theuh anih kha.

Khawtlang leh inthenawm khawvenna ah pawh a ni tho. Thenawmte kherlo pawh inchhungkhura buaina a lo chhuah chang te pawh hian mahni thiamlohna hmuh a har hle thin. Khawtlang hruaitute leh thenawm khawvengte kher ran a, kawng thenkhata an hlawhchham hnu pawh a kawng lehlama la beih fat fat chingte hi inchhungkhur, kohhran, khawtlang leh thenawm khawvengah pawh ngêt siamtu an ni fo thin a, chumi chu, "Keimah em ni?" i han in ti phawt teh ang. Mahni inhmuh kim hi a har khawp a, darthlalang lian i inchhawp law law teh ang aw.

Inchhungkhur leh khawtlangah chauh nilo, pawlho ah pawh mite hmuh tlinloh ching dawklak ho hi chuan anmahni bak hi tling leh felah an inruat thei thin lo. An zuam zawngte dinhmun an it deuh phei chuan karfung hrang hrang ruaiin kar phawn ngei tumin mi phenah tan an la nasa thei thin khawp mai. An tlawn zawng leh an laka tlaktlum an duhna zawngah chuan zah pawh dawn eih lovin an che leh hreh hauh lo. An duhsak zawngte vawrh lansarh an thiamdan leh, chumi let leh lam chu lamtang ngahna ani tih hmu pha reng chunga che vak chi a la awm leh theih a. Chung mi te pawh chu, "Keimah em ni?" i la ti zel teh ang.

Thiam taka rorelnaah lamtang siam a, lang mang si lova mahni tânghma hai thiam riau leh mite dah offside thiam riau, tuna mite thinlung thiamtak mai a chawk nu a, nakina an hriatthiam hnua a nih nih lo ni zo tawh tur si ang zawnga hma la chite pawh hi mihringah hian a awm leh theih a. "Miin i chunga an tih a in duh tur ang bawkin mi chungah pawh tive rawh u" tih thu erawh hi chu ama tan a lalut ngailo thung. Chumi pawh chu, "Keimah em ni?" i la ti chhunzawm zel teh ang.

Tha, felfai leh dik kan duh a. Kan han sawitak leh a dang tamtak, ni thlup ang a lang, mahse a nihna takah chuan Moral Corruption hlauhawm tak ni si lak atanga kan fihlim a hun a, thil diklo palh a lo awm pawh a, "Keima thiamloh a ni, keimah zawk hi alawm" kan tih a, thiamlo nih kan inchuh nak nak hunah thiltha chu amahin a lo piang tawh ang. Chu thil chu zawlneite hrilhlawk kher ngai lovin kan banphak maiah hian a awm a, kan hmu pha reng nghe nghe a ni. A lo inherchhuahna daltu a la awm thei cheu mai!!! Chu a kawngdaltu chu "Keimah em ni?" tiin i inbihchiang theuh ang u.

ENGNGE HLAUH TUR?

Hlauh nei miahlo leh ngamloh nei miahlo mihring chu an awm awm love. Amaherawhchu ngam zawng leh hlauh zawng chu a dang thei viau ang. Pawngvina pawh khan a nupui chu a hlau hle in an sawi thin kha. Pasaltha huaisen, ramsa kawlh leh ral hlauhawm hma a zam ngailo te pawh hian min tina thei lemlova kan ngaih pangang, sazu no mit keu... tih vel mai mai pawh hi hlauh taktein an hlau thei tlat nia

Hlauh hi a tangkai chang a awm theiin, kan hlauh a zirin kan mizia pawh thui tak a hriat theih awm e.

Hnam mawl apiang hi tihthaih an nuamin, an hlauhna avangin thunun pawh an nuam thin. Hlauh tur ani nge nilo fiah lemlova mi sawi apiang hlau thei viau mi hi a awm theih khawp a, hetiang mi te hi dawihzep kan tihte chu anni mai lawmni? Mahniin fiah leh tih tum lemlova mite sawi lam apianga thle kual mai mai hi tunlaiah pawh kan nitin nunphung hrim hrimah leh kan rinna kawngah pawh kan tam thei viau dawnin ka hria

Mizote pawh hi engngemaw chenah kan intichangkangin, fin leh varna kawngah pawh kan indahsang viau a. Amaherawhchu tihthaih kan la nuam riau in ka hre thin. Mi sawi hlauhawm apiang hi hlauh tur emaw kan ti niin a lang. Hmanni lawkah Nostradamus-a hrilhlawkna in mi tamtak a tibuai a, chumi hnuah NIBIRU kan buaipui leh luih luih anih kha. Mi thenkhat hlauhna nei ve lova thlamuang taka awm te chu mawl kan la ti viau lehnghal

Chutiang bawkin Bible Society leh Census hlau reng reng in mi thenkhat an lo hmanhlel a. European Union leh khawchhak lungpui hlau em em lah bo lo. Heng ang hlau a phar phar ho hi zawt ila an hlauh chhan ber hi an hria ang em aw ka ti thin. Kan hlauh tur hriat zawh zai dan em em hi engatinge ni ang aw? Kan Christianna kum za kan lawm tawh hnu ah pawh heti reng reng mai hi chu Christian diktak awmdan tur ani ang em aw!!!

Paula ten, "Pathianin hlauhna thlarau min pe lova, huaisenna leh thiltihtheihna thlarau min pe" an tih lawm lawm laia mi sawi hlauhawm apiang a-dik-a-dawk pawh thlu lova hlauh ngawt zel mai hi kan dawihzia leh kan tak loh zia tarlanna chauh ni mai hian ka hre thin.

Kan thil hlauh hian min thunun tlat a, India dan a misual hremna a nat avangin thilsual kan ti ngam lova, nu leh pa kan hlauh leh kan zah avangin an mithmuhah thilsual kan ti ngamlo thin ani. Kan hlauh zawng tak chuan thildang min ngaihtuahtir theilo fo. Kan piputen an sawi thin kha, "sairamchhuah a sai hlaua tlanchhiat chuan sakei te mai mai chu kan palthle lawl lawl mai ani". Kan thil hlauh hian min thunun tlat avangin hlauh tur diktak kan hriat a pawimawh hle ani.

Pathian hi kan hlauh tur diktak chu a lo ni e. Pathian hlau han tih hian zah leh tih a kawk tel ani tih pawh hre tel ta bawk ila. Kan insawi anga Pathian hlau tak tak ni ila chuan tuman European Union, khawchhak lungpui..etc..te hi kan hlau lek lovang a, corruption, tualthah leh inrawk tih tawngkam te hi kan hre kher awm love. Pathian aia changkanloh kan hlauhna te, Pathian aia retheih luat kan hlauhnate hian eng sual kawng nge min zawhtir a, eng pawi nge kan khawih thin tihte hi i ngaihtuah fo thin ang u

Khawvel ram hruaitu nirei te

Khawvelah hian thiltithei tak tak an tam a, rei tak tak ram hruaitu nihna chelh sawi tur an tam mai. Thenkhatte hi chu thuneihna hmansual avanga rei tak tak ram hruaitu ni an awm. Khawvelah Dictatorship duhlohna a lian tial tial a, heng mite hi paihthlakin an awm mek anih hi. Hei hi tunlai khawvel news ani. Kumin phei chu hetiang lama inpaihthlak hi a hluar hle a, nawrhna liantham fe fe a thleng mup mup anih hi...!! Ram hruaitu nihna chelh rei deuh deuh mi pathum chanchin hi han tarlang dawn teh ang

(1) MUAMMAR AL GADDAFI:- Kum 1969 a Libya lal King Idris paihthla a tun thlenga Libya ram thuneitu ber, Colonel Gaddafi hian kum 42 tehmeuh mai Libya ah hian ro a rel tawh nia!! NATO sipaiten paihthlak tumin an bei mek a, ram buaitak leh hrehawm ber pawl an ni. Gaddafi hian khawvel ram hrang hrang hruaitute lu a tihai hle a, an ram mipui tamtakin an duh tawhlo. An hmalam hun tur khawvelin a thlir mek ani

(2) ALI ABDULLAH SALEH:- Yemen ram President Saleh hian 1978 atang khan vawiin thleng ro a la rel a, paihthlak tumin an ram mipui an inhawrkhawm tuau tuau reng. Nunna tamtak chan ani tawh a, khawvel tibuaitu pakhat a tling. Equatorial Guinea President Teodoro Obiang Nguema leh Angola President Jose Eduardo Santos te pawh hian 1979 atang khan an ram hi an awp bawk

(3) HOSNI MUBARAK:- Kumin 2011, February 21 a an ram mipuiten an paihthlak tak, Egypt President thin Hosni Mubarak khan kum 30 chhung Egypt ah ro a rel. Khawvel ram hruaitu thiltithei ber pawl a ni. Tunah chuan paihthlakin a awm a, a chungchang ngaihtuah hmabakin a awm mek

Hetiang hi sawitur an awm nual a, a langsar deuh deuh ka han tarlang ani. India ram ah pawh kum 34 chhung tehmeuh mai W.Bengal a rorel tawh CPI(M) chu hmanni lawk khan vote hmangin paih an lo nihve bawk kha.

Kan Mizoram hi ka han thlirve a, hetiang khawpa mipui phun lungawilo vuivai thawm a rin tawh hnu pawh a tharum hmanga thuneitute tibuai em kan la awmlo(?) te hi vanneihna nasa tak a va ni em!! Mi ram buaina hi ralthlir mai mai lova keimahni lam inenfiahnan a kan lo hman thiam loh chuan mitkhapkar lovah kan ram hi min rawn run thleng ve dawn tih i hria ang u

The Woman Who Love Me

KA PI (ka pa nu) hi tunah kum 92 na a hmang mek a, pitarah chuan a hmeltha pawl tak niin ka hria. "Lalmam" tiin duat takin min ko thin a. Kan unau hi 8 lai kan ni a, ka nu leh pate sawidanin kan unauza zingah chuan KA PI hian keimah min duat ber awm e. Keipawhin chu chu a dikin ka hria. Mahse ka unau dangte pawn anmahni duat berin an inhre theuh nia.

KA PI hian ka sawi tawh ang khan min duat hle mai a. Nikhua ka hriat tirh atang khan ka school bang hi ka ipte minlo laksak a, ka uniform min thlaksak a, thingpui min siamsak ziah thin. Naupang te e tilo khan thingpui ka heh thin ziate kha aw.... Kum 17 ka nih thlengin a bulah ka mu. A mit that lai chuan zantin Bible a chhiar ziah thin. A mit fiah tawh loh hnu tun thleng pawh hian ka la chhiarsak fo mai.

2005 kum khan tumkhat ka school bang hian kan inhnuaia alo lut hi ka hmu a. Ka kekawr tla chhar a tum lo niin. Ka hmuh lai tak chuan lung a rap pial a, a tlu ta thut mai. A ban dinglam chuan ban kil hriam lai tak chu a va vua a, a tliak nghal hnawp a, khami tuma ka manganzia kha awww. Chhungte tumah inah anlo awm silo. Ka pawm chhova, khumah ka mut a, tar kum 80 chuang tawhin khatiang khawpa na a han tuar hmel ka hmuh khan a aia na tawrh ka chak em em mai. Ka tahpui hial ani...

Damdawiinah pawh keiman ka riahpui a. A bulah ka muve a. Tlangval a pumpa, pitar bula han mut chu mi thenkhatin mak min lo ti deuh hlek ani awm e. "Engtinnge tar bulah i mut theih?" tia min zawt te pawh an awm nual nia. Keichuan "Engvanginnge ka mut loh lem ang ni? Ka tan chuan 'tar' ani satliah lova, KA PI ania sin. Ka nausen tet lai atanga min awmtleitu ani a, a mi tawngtaisakna avanga vawiin khaweng hi la hmu thei chauh ka nia sin" tiin ka chhang hlawm anih kha.

Ka nupui boral hnu pawh hian tun thlengin ka school ban apianga thingpuino minlo hlantu ala ni a. Engtik niah emaw chuan he lei dan zawmin minla kalsan ve leh ngei dawn tih ka hria. Chutih hun tur chu ka huphurhlawk takzet ani...

Tunlaiah mi tamtak, an pi leh pute zahpui ching an lo awm ta hian KA PI ka hmangaihna hi a tizual zawk thung. Thenkhat chuan mikhual neih nikhuate hian chaw kil tir ve lovin room hranah chaweitir an ching, inthlahrung reng rengin a hringnun chawhnu lam an hman liamtir thin. An thut theih chhung chuan ka tihve ngailoh kumkhua tur thil ani a, an inthlahrun lohna tura theihtawp chhuah hi ka tihtur a ni. Keichuan mi tamtakin an nin em em thin, a dilchhut te hi ka ningve dawn lova. A bengchhet vang anih hriain ka chhang zel ang. Mi tamtak zahna thin, khawlai lenpuite hi ka zak dawnlo. Minlo hmumawhtu hnenah chuan chaw sehsawma min hrai liantu anih thu ka hrilh zel mai ang.

Damchhung hun tawite hmantur a la neih hi hlimtakin ka hman liamtir ang a, ka hmangaihna hi kawng tinrengah lantir ka tum thin ang


OLD IS GOLD

It's My Life

Ni e, i nunkhua a thlangher hma chuan i nun kha nangma ta liau liau bik emaw tiin ‘It’s my life’ chu han ti zel phawt mai teh. I taksa kha tu ta nge? E le, namgma ta..!! I ta, i taksa a ni a, i thuhnuaia awm a ni. I duh leh i banah mupui lem i chuantir thei a, i duhleh i mawngtamah pawh Diabola lem pawh i chhu thei alawm. I taksa, nangma ta leh i duh duh a i tih theih ani. I biangah pawh i duh chuan chukchu lem pawh i chhu thei a, i duh chuan chhimtir lem pawh i chuantir thei alawm. Rawn sawisel che an awm anih pawhin chumi chu mi a a ni tihna a ni mai a, ‘It’s my life’ tih hi a la hrelo a ni. Chanchintha Luka ziakah engnge inziak a pawmawh lova, Van lehkhabu ah pawh i hming chu lo chuanglo mai mai ang hmiang. I nun kha i ta a ni a, i thlarau chantur pawh nangma reltur a ni. Tuman sawitur an nei lova, sawi phak pawh an awm heklo.

I chhungten i duh aia hmain an kaitho thin che em? Peihlo chung chungin i tho thin em ni? I chhungte chu an mawl bawn tawp a nih chu. Ransa i ni lova, zawngte leh ui pawh i ni heklo. Pangpar huana dah ngai i ni lova, midang ang tho i ni. Mifing Plato-a te, Socrates te leh Aristotle te ang tho a siam i ni a. Khawvel Scientist ropuiber pawl Albert Einstein ang bawkin mit pahnih neia siam i ni a, India Hnam Pa Mahatma Gandhi ang bawkin hriatna beng pahnih i nei ve a, I zingthawh hun leh i mut hun relsak leh ruatsak ngai turin mi chhiahhlawh lah i ni heklo. Engahnge nangma mimal nunah hian i chhungten rawn inrawlh ve teh an tum thin?. Hei hi an hre velo ani mahna….. ‘it’s my life’ tih hi.

Nula i ni a, tunlai thil awmzia hre pha ve chin i ni a. MTV leh Channel [V] en pha ve tawkin i changkang a. Britney Spears nun leh Paris Hilton inchei dan te, Christina Aguilera leh Avril Lavigne chetphung leh khawsazia te pawh i hrethiam phak ve vek a. Mi changkang leh ram changkanga nula changkangte incheidan leh nun dan chu i lo copy a. Tahchuan he Zoram khawvela cheng, thliarkar rilru zim ho hian an sawisel che a ni maw? Engahmah ngai suh, an nun a ni lova, i nun a ni. I sam rawng sawisel tur khan tunge an nih? Duh leh i tikir thei a, duh leh i tihring thei bawk a, duh leh i met kawlh vek thei bawk alawm. Nangma sam a nih kha. Kohhran thalai hruaitu inti Christ deuh deuh ho khan i inchei dan leh i thawmhnaw chungchang kha Department inkhawm thupuiah te hman an tum hlawm em? Mi mawl, mi a leh mi chhawih an nih kha. Engahmah ngai suh. I rangkachak bengbeh man kha chengkhat pawh an thawhpui lo che a, i kawrhnuai leh i kekawrte pawh nangma suma i lei alawm. I duhleh a chunga thawmhnaw ha miahlo pawhin i leng thei alawm, nangma taksa leh nangma thawmhnaw a ni miau alawm. Duhleh rangkachak thi pathum awrh chung pawhin tuikang i nghak thei a, thuah sariha chhah pawh in i hmai i plaster thei bawk.

I mithmul kha in Pastor ta ani lova, i duh leh i pawtkawlh thei a, i duhleh i rinchawp thei bawk. I duhna hmun hmunah khuavang chhinchhiah i siamchawp thei bawk a, thenawmpa khabe ah i va hnawihtel a nih ngawt loh chuan tu pa huanthlai mah a pet hleinem. I hmui hnawihsen leh hnawihdum pawh i thu thu a ni. Beng pakhata bengbeh pali beh tlar pawh i duh a i nei a nih bawk chuan, chu pawh chu i thu a ni. Tu nu leh pa mahin an sawi buai phak i ni lo, i duh a, i ti a ni mai. I kawr hak pan thu leh i pawnfen chhinzia te, dul lang kawr emaw kekawr kap 2- inch vela tawi i hak thu fellowship naa lo sawitu chu a chiang chiahlo ani maithei. En ngun deuh teh, a hmavir a lo tla then te pawh ani mahna. A fanu pawh i ni lova, a fapaa bialnu pawh i ni heklo. I duhleh i mal thui lutuk lang tur pawhin pawnfen chhing lutuk nen pawh khawlai i leng thei alawm. I mal a ni a, a tihlanna hun leh hmun ah buai vak a ngai reng reng lo a nia. Chumi avang chuan khawilai thalai hruaitu tunlailo zetin emaw an fellowship naah a lo sawi che emni? Fellowship tawhlo tawp la a ni mai alawm, fellowship lo pawhin lenna tur i hre tam tho a ni lawmni?

Tlangval i ni maw? Eng ang nu leh pa nge i neih? Nu leh pa thenkhat hi chu an mawl ve khawp a nia. An fate nun hi an nun emaw ti hian anmahni thu thu hian awmtir zuk tum tlat thin a mawle!! An nulat tlangval chhuaha anmahni pawn an zawm peih hauh loh tur hi an fate zawm tir teh hi an tum thin a nia. Midang nunah thuneih talh hi an tum fo mai a, a changkanloh thlak asin!! Kan ngaihsan em em sapho pawh hian an fate mi puitling an lo nih chhoh tawh chuan an fate nunah an inrawlh tawh ngailo tih te hi an hrelo emaw ni, mi thunun teh hi an tum fo mai. Chuvangin nangma lam tal i fin a ngai a, i nun kha nangma ta a nia , i pain emaw i nuin emaw a hmansak dawnlo che a, nangma pual liau liau a nih avangin nangma hmantur a ni. Midang an rawn inrawlh tur a ni lo. Sunday a lo thleng a, tu pa thusawi thiamlo lutuk rei em em mai ngaihthlak ziah kha i ning thin em? A awm khawp mai. Sunday School kaia thu ngaihnawm loh deuh deuh ngaihthlak aia tuipuiawm zawk programme i hre teuh va, i kal ta zawk a nih pawhin i nun a nia, nangma thu vek a ni.

Zu leh ruihtheihthil te hi an sawi chamchi a,a sawitu lah hi upa lam an ni deuh zel lehnghal. Anni ang rual tan chuan a tiha tih ve chi ni nghallo chuan. Nang erawh chu tlangval i ni a, nupui fanau pawh i nei hleinem. Vawikhat tlangval manah i ti a nih pawhin nangma ka leh pumpui, nangma thisen zam leh chuap a nia a khawih. Mi mawl zinga a mawl zual ho hian thu rawn neih an tum ve teh fo hi an inrawlhlohna turah an inrawlh a, hei tak hi a lawm tuarhar em em, mahni kuanglo nawr an lo tih fo thin chu

Engang mihring pawh ni la, eng ang nun pawh nei la, i nun a ni a, i ta a ni. I duh angin i hmang mai a ni. Chu chu tunlai khawvel kalphung a ni. Ni e, a saptawngin ‘thinker’ an inti emaw ni, ‘critic’ an inti emawni, a enga pawh chu lo nise a chuti lai a khati lai lo ti lo ti ho reng reng hi chuan hringnun hi duhkhawplo reng reng in an hmang liam thin. Nang erawh chuan “khawvel alawm” tiin i hmui tuai la, i khabe dawmin ‘It’s my life’ han ti leh phawt mai teh.

Tichuan hlimtakin nuam em em leh pang tinatu nei lek lovin hringnun i hmangliam ang a. Vaivut chu vaivuta kir leh turin YMA hovin 6×3 a lei an laih khuar, uluk taka tlawmngai zual hovin an phiahfai leh an tlak rual sa ah chuan an zalh che ang a, i khabe dawmna puanah pawh ‘It’s my life’ tih chuang ngei an hmansak maithei che a sin. Nakinah Rorelna Lalthutphah hmaah chuan Nunna Bu te an keu ang a. Mitthi te thlarau chu tihlanin a awm ang a, chung thi theilo tharau chu an thiltihin a rawn zui ve bawk ang. Chutih hunah chuan nang pawh ‘It’s my life’ khan a rawn zui ang che

Van Pathian chuan ke ler thleng a puan ropui sinin A awmah rangkachak kawnghren a hreng a. A lu leh a sam chu beram hmul angin a var a, vur ang maiin. A mitte chu meialh ang a ni a, A kephahte chu dar tle mi ang a ni a, rawhtuina meia rawh thianghlim tawh ang maiin. A aw chu tui tamtak ri ang a ni a, A ka atang chuan khandaih hriamtak a chhuak a, A hmel chu nisat vanglai ang a ni. Chumi hmaah ngei chuan ila ding ang a, i hnungah i thiltihte chuan a rawn zui bawk ang che.

Keima nun alawm tia zilhna leh fuihna thu nangmah hmangaihtu ten an hrilh thin che awih lova i lo namnul kualvel kha i inchhir hun a lo la thleng ang a, theih nise siamthat leh i chak em em ang a. Mahse i tan inchhirna khua a tlai tawh ang a, keima nun a ni tia duhtuilo theihtawpa ilo chhek tawh i nun chhuanawmlo leh demawm, zahpuiawm ngawih ngawih chu Chatuan Lal hmaah chuan tihlan a ni ang a, A finna leh ropuina hmaah chuan i ding zo angem le? Inchhirin awmzia a nei tawh dawnlo. Chutih hunah chuan i hmai i hup ang a, A ropuina hmel eng hmaah chuan bihrukna hmun reng a awm dawn si lo.

I nun chu i han thlir ang a. OK, it’s my life i la ti ngam cheu angem?

Nu leh Pate Hnena Naupang Thusawm Pek

1) - Ka kutte hi a la te si a, ka phak tawk a hna ka thawh ve apiangin fel famkim thlip thlep turin khawngaihtakin min beisei suh. Ka ke te hi a la te si a, i ruala ka kalve theih nan chak takin pen hlawih hlawih suh.

2) - I mitin thil alo hmuh tam tawh angin ka mitin thil a la hmu tam ve lova, khawngaihin ka tana tha tur min hmuhtir ta che. Tullo lutukah min khuahkhirh vak lo bawk la

3) - Inah hnathawh tur a awm fo dawn a, reilote chhunga naupang chhia chauh tur ka ni si a, phur taka ka thawh theihnan uluk takin inchhungkhur hna kalhmang min hrilh reng bawk la

4) - Ka rilru leh ngaihtuahna hi a la no riau va, pangchan mai te pawh hi ka tan a la awm riau mai a. Khawngaihtakin ka mamawh ngei mai tanah rilru min pek sak ang che. Min sawiselin min phunchiar khum fo lo la (nangni pawhin phunchiar khum in duh bik loh kha). In laka thiltih in duh ngei tur angin ka lakah pawh tive ang che u

5) - Pathian hnen atanga thilpek hlu ka ni. Pathianin ti tura a duh ang chiah chein min hlut la, Ka thiltihah mawh min phurh sak la. Nupui pasal tha ka neih theih nan min pui la, hmangaihna hmangin min vawng ang che.

6) - Puitling tha ni turin mi fuihna ka mamawh. Sawiselna chungchangah a chintawk hrethiam la, keimah min sawisel lo pawhin ka thiltihte chu i sawisel thei reng tih hria ang che

7) - Keima chungchangah thutlukna ka neih ve theihnan khawngaihin zalenna min pe ve la. Ka diklohna atanga ka zir thiam theihnan ka hlawhtlinloh pawh min phalsak teh

8) - Khawngaihin ka tlin bakah min phut sang lo la. Ka theihtawpa ka han tihve pawhin i beisei ang a phalo a ni tih min ngaihtuahtir thin. A harsa tih ka hria e, mahse ka ute nen chuan kawngaihtakin min khaikhin suh

9) - Thiante nena kan inkawm hlim changin thilsual ti mai turah min ngai suh. Min hlauhthawnpui lutuk reng suh. Ka nu leh pate hi ka tan in hlu hle a ni tih entir fo ka duh

10) - Sunday School ah leh Kohhran inkhawmah min hruaive fo rawh. Pathian thuawihna kawngah ka kalve zel theih nan ka entawn tur mi lo ni ang che

Hringnun leh Thihna

“Dimtein kal rawh aw, tah hian ka duhlai chu cham ang a zal a nia”

War Cemetery pakhatah chuan he thu lungchhiatthlak zet mai hi a awm a. Ni e, he leilung hian kan duhlai ngawih ngawihte vut leh vap chu a lo chhekkhawl thin anih hi!!! Thihna hian bawhchhiatni atang tawh khan hringnun hi a sual reng a, inhriatrengna reng awm tawh lohna hmunah nun hi a hnuk liam thin a lo ni

Kan duh reng vang ni lova kan hmangaih tak ten hringnun an herliamsan ni chuan - ‘rihsang mualliam kan la tiam lo’ tiin au lawm lawm mah ila auh kir rual an ni tawh lo. Thenkhat chu an neihchhun, an hmangaih em em leh an innghahna neihchhun liau liau te chu he Thihna kutvawt hian a lo laksak tawh hlawm a. Chutiang hun a lo thlen a mangthana thu hnuhnung sawi a tul chang a - .“Thlamuang takin kal rawh, ka duhlai” han tih dam diai mai te hi keichu khawvela thu sawichhuah har ka tih ber pawl a ni thin

Ni e, kan duhtak, kan hmangaih em em leh kan la thlakhlelh ngawih ngawih ten mual min han liamsan a. Kan pawm nin loh leh kan duat em em laite chu Thihna chuan a hnuaia kun turin min chhuhsak lui a. Tlangval tlawmngaite thlan laihah kan han zalh a, thlan vur zawnga lungnawi leh leiin an thlan thing kuang a zuk den rik te chuan thinlung hi a nghawr dawt dawt a. Thlan vur zawh anih tawh lah chuan a pawng thur ringawt a. Leivung tharlam sen seng sung chuan, “I duhlai chu ka angchhungah ka lem ta” tia chapo hmel takin min rawn hmachhawn a, chutih hunah zet chuan patling dawn hi a tawi tuk tawh mai thin

Hringnun tawp dan chu chuti zawng chu ani a, hringramah hian beiseitur reng reng an awm tawh lo. Anmahni ngaiin lokir leh turin han au thin mah ila khawvel kalphung leh nihphung bawhchhia a he hringrama rawn let leh te zawng rapthlak leh tihbaiawm mai an chang tawh thin

A nih leh Thihna chu anchhia em a lo nih chu le? Keichuan anchhiaah ka puh phal dawn hauhlo. Hringnun par rimtui leh vulmawi lai ber chu Thihna hi a ni zawk!!! Mifingte chuan mihring hian hunpui pathum kan nei tiin an sawi thin. PIANNI, INNEIHNI leh THIHNI te hi. Heng hunpui pathum zingah hian a ropuiber chu Thihni hi a ni. Tu dang vakin an hriatpui loh in i piang thei a, i damchhungin inneihni i tawng miahlo thei bawk. Thihni erawh chu i tawng ngei ngei dawn a, mi tamtakin an hre ngei bawk ang. Chuvangin Thihni hi ni ropui chungchuang a ni!! “Thihna ropuina em em chu chatuan nun nei tur a kailawn, zawh ngei ngei ngai a nihna hi a ni”.

Thihna hi malsawmna a ni tih hi thilmak a ni hran lemlo. Hringnun zinkawngah hian kan hriat leh thiamna te, kan ropui leh theihna miltawk ang zelin mitinin phurrit kan phur theuhva, chu nghawngkawl kan khenthlak theihna awmchhun chu Thihna chauh hi a ni. Thihna lui kan daikai hunah chauh engthawlna kan chang mai dawn a lo ni. Kaltaten ngaiin min au ngai lova, an kalsanate hi a ni lunglenga kur thin zawk ni

William Shakespeare khan Thihna hi Siamtu’n thiam taka a ruat a ni tih a hmuthiam ngawtin ka hre thin. HAMLET thawnthuah khan ti hian a sawichhuah kha, “Khawvela ruang hmasaber kha ruang chhiarsenlohin a zui tawh a, i pa khan a pa a lo sun tawh a, chutianga insun chhawng zel chuan tun hun hi min thlen a ni” tiin a sawichhuak a nih kha. Thihna awm talo se, khawvela mihring piang tawh zawng zawng hi khawvelah la awmin hringnun hi han hmangho vek mai dawn teh ila chuan khawvel hi a buai ve ngawt ang le!!

He hringnuna Siamtu’n themthiam taka Thihna a lo dah hi nun tihlutu, nun timawi a tithlakhlelhawmtu a lo ni a, anchhia awzawng a lo ni love

CCE

Ni hnih zet chu CCE hi kan training ta a, a that dawn viau laiin harsatna hmachhawn tur tamtak a awmin ka hria. Zirtirtu indaih mang lohna schoolah chuan a applicable lo hle in ka hria

Kan training na a kan lecturer hnenah "zirtirtu indaih lohna school ah hian engtin nge kan apply ve ang?" tia ka zawhna pakhat chu "a tihdan dan a awm mai ang, in hah deuh dawn tihna ani mai" tiin min chhang nia. Mak thei ngei mai

Zirtirtu hna lak nikhua ah te, thingtlang atang te in theihtawpin an rawn dilve a. Written test ah chuan awlsam takin an tlingve mai. Mahse personal interview lamah erawh chuan khawpui mi, "Ka pa Mawia" tih tur nei te bawk an tling leh thin.. An post, thingtlang lamah an awm peih leh thin silo. Khawpui lamah an "Pa Mawia" chuan a sawn a, an post chawp a sawn leh anmahni chauh sawn te nen, thingtlang school lamah chuan zirtirtu awm peih a bar an awm tawhlo.. Mak thei ngei mai

Zirlaibu mai piah lama tihtur tam lutuk te mawlh mai hi ani. An textbook hi modified fe loh chuan zir sang pui pui, lehkhathiam si lo an kat nuk dawn chiang ani. Grading system a kalpui anih dawn tak avang in fail theihloh tluk anh tawh dawn a. A chhan chu grade hniamber pawl, Grade ' D' hmu te pawhin pawl an sawn theih zel tawh dawn vang ani.. Chu chuan rah thalo tak, Unemployment problem bak a hring leh dawnlo

Engtia tihvak ngaihna ka hrelo. Naupang hnenah hian bawngtuthlawh hmangin mau sat turin hrilh ila, har an ti hle ang. Mahse chempui hriam tak pe thung ila chuan awlsam takin an sat zung zung thei ngei ang

FACEBOOK

Vawiin chu Facebook chungchangin ka ngaihtuahna a luah tlat mai. A history leh a chanchin lam sawi vak erawh chu ka tumlo. Facebook atanga thil ka tawn leh ka tangkaipuina lam ka tarlang mai mai teh ang.

Kum 2008 tawplam atang chauh khan ka facebook ve tan a. Hmeichhia chu a hmeltha tha ka add thin a, mipa erawh Liverpool fans an nih loh pawn misual.com lama ka thiante leh ka hmelhriat hnai tak te an ni tlangpui awm e.

Thiante hi 600 chuang lai ka nei ve a, mahse ka be vek ngailo. Midang pawh anni ve tho. Biak lemloh pawn an awmve teuh hian a nuam tlat... Tihtur neihloh chang apiangin ka lut thin a, nuamve riau..

Hmanni chu friend request pakhat ka dawng ve nawlh mai a, ka confirm hmaa a profile ka han en nak chuan hmana Middle School kan kal laia ka thianpa, a chanchin ka hriatzui tak reng reng loh, a thih leh dam pawh ka hriat phak tawh loh alo ni reng mai a. Facebook zarah kan intawng leh nawlh mai. Kan inbe zui a, a tihdan ang a tive in ka thian hlui tamtak ka hmuhchhuah belh ta teuh mai.. Ka tangkaipui viau ani

Thian hluite ka hmuhchhuah rualin thil pakhat hmuchhuak telin ka inhria. Chu chu Mizotawng kan sawisak nasat dan em em hi ani. A bikin hmeichheho zingah ani lehzual. A chhan ni ber a ka hriat chu hnamdang nen kan in awm pawlhsawp lo thei si lova, kan chat, kan like, kan comment, kan update.. Sap thian ka neihve tamtak te hian slang an hmangve tho, mahse kan tawng kan tihdan ang hian tuman an tawng spelling diklo nasa lutuk an hmanglo mai nilovin an tive ngailo tlat ani.. Tawng hawrawp dik leh kim thlap thlapa type i zir teh ang u

He thu tawplam chhiartu te chuan thuziah thiamlo thuziah ani tih hria a lo inngaihbel theuh turin ka ngen che u a, kan inngaihbel theilo anih pawhin keima mimal ngaihdan leh hmuhdan, ka experience kara ka zeh tel ve mai ani tih minlo hriatsak dawn nia..

KA NGAIHTUAHNA

Dt 17th March, 2011 ani a. Zan dar 10:45 ah chuan inkhel en ka tum avangin TV bulah ka la mu meng kiau va... Thil tamtak ka rilru ah a rawn lut ta nuai nuai mai.

Heti hian ka ngaihtuah a. Kan ram zimte ah hian Christian tha inti, mahse Pathian mithmuha tling silo hi kan va tam ta em!!! Duhamna leh sum leh pai leh mipat hmeichhiatna lama kan tlan nasat tawh dan te hi a va rapthlak zozai ta lutuk a, Pathian Thinurna Berhbu hi kan tawngbaw tep tawh hial ang a ti tein ka ngaihtuah mai mai a.

Kan ramah, kan tualzawl ngeiah, hnamdang mi kuttuara kan Mizo pui ngei ten an thilneih mai bakah an nunna hial an chan changa a tisual tute mipui thinrim in an zilhhau changte hian 'a Christian lo' tiin kan lo sawisel thin. Pathian rawngbawltu nia inngai, Pathian rawng pawh bawl ngei, amaherawhchu mahni tana hlawkna leh hamthatna tur alo thlen changa Pathian rawngbawltu nih intheihnghilh leh thak si te hi kan va tam ta em!!!!

Kan thalaite nundan te hi. Nula, mahni khua nilo hmundanga hnathawka awm, ngaihzawngte nena nupa ang mai a in khata cheng tlang ta mai mai te hi an va tam ta em.. Kan thalaite hi he HURNA sualah hian an tlulut zo ta. Sodom leh Gommora sualna te kha kan tunlai dinhmun nena khaikhin chuan a nasa ta lem bik lo. A rapthlak teh e.

Hmundanga Missionary atana kan tirhchhuah te hi ka ngaihtuah kual ta zel a. Thenkhat chu an lawmman tur a tlem lutuk avanga Missionary hnathawk chhunzawm peih talo ka hre nual mai. Heng ho te hi Pathian thinurna meipui chhawmnungtu te ani mai awm mange tite hialin ka ngaihtuah a, Pathian hian eng ang takin ngai ve ang maw!!

Chutia ka ngaihtuahna ka kawm mawlh mawlh lai chuan ka harh thut a, Ten-Sports ka han hmeh chhuah nak chuan ka inkhel nghah chu 20mins lai an lo khel reng tawh a, a tuk zana ngaihtuah chhunzawm leh turin inkhel lampang ah ka rilru ka dah ta rih..

DAWN TISEI

(1) I hnawl hnu Pathian hnenah pe lo la, i duh lai ngei pe thin rawh

(2) Mihring remruatna chuan beidawnna mai a thlen a, Pathian remruatna chuan beiseina tawp chin neilo ah a hruai thin

(3) Pathian hmaa thingthit fo na hian nghet takin min din tir thin

(4) Pathian hmaa thingthi thin mi chu tute hmaah pawh a ding ngam thin

(5) Mihring damchhung hunah hian Setana chu mi tikhaihlaktu a nih fo avangin hun kian ngai suh

(6) Pathian hunbi ruatah zawhna zawt ngai suh ang che

(7) Phurrit phurh i nei em? Rinnaa tihkian a nih theih nan Kohhranah thlen thin ang che

(8) Pathian hnena i tawngtaiin, i tihdan tur Pathian hrilh lo la, a hnathawktu tur i nihzia inhriattir mai zawk rawh

(9) Pathian Thu hi kan tidanglam tur ani lova, Pathian Thu hian min tidanglam zawk tur a ni

(10) Biakin chu tawngtaina hmun ani tur a ni

(11) Pathianin a nemngheh tawhte chu a tichak thin

(12) Engkimah ruahman lawkna nei thin rawh: Nova'n lawng a tuk lai pawh khan ruah a la sur bik lo

(13) Mi tam zawkin Pathian rawngbawl an duh theuh va, mahse zilhtu dinhmuna awm an duh chawk thin

(14) Nitin insawizawina tha ber chu Pathian nena lendun a ni

(15) Setana chu i chungah chuan tir suh, thunun a tum ngei ngei ang che

(16) Thudik tichhe thei engmah a awmlo

(17) Lainatna hi thehthang bo a har, a lo kir leh zel thin avangin

(18) A tithinur tu che chuan a thunun che a ni

(19) Manganna hi mahni nihna leh hlimthla lanfiahna tha tak a ni

(20) Setana chu inchi khat chauh pawh ram han pe vaih teh, roreltu nih a tum nghal mai ang

(21) Mihring mantu ni la, i man hlauh chuan Aman a lo tifai mai ang

(22) Pathianin a hnathawk turin mi tling leh fel zawkte a thlang ngai lova, a thlana te chu a tlintir mai zawk a ni

Fak Hlawhlo Valrual: MZP

Mizoramah hian Organisation leh Association engngemawzat an awm a, heng zawng zawng zingah hian keichuan MZP hi faktlak ka ti ber mai. A chhan hrang hrangte-

Mi thenkhat chuan “MZP hian engngemaw an tih tak tak le? Nileng lengin office ah an thu a, vai pawisa an khawn vak vak ringawt a, Zoram tan hian engmah an thawk kaw tak taklo” an tih hi ka hre fo mai. Mahse heng mite hi he kan Mizo hnamin hnam ang zawnga harsatna leh hnam issue khawihphak buaina kan tawh chuan "MZP in tise, khwnge MZP an awm?” tia iak peih peih thinte anni tih hi ka hriatzin pawl tak ani ve thin.

Hmanni lawk khan H & TE Dept’ hnuaia Mizoram quota a Technical Course zirtur thlanna ah buaina (result diklo) kan tawk a, khangte kha MZP chhuichhuah ani lovem ni? MZP in hmala lose laymen ho hi chuan engmah hre lovin ‘A va mak ve’ tiin kan thlirliam leh ringwt ang chu. Kha thil avang khan MZP hian fak ahlawh em? Teuhlo mai. Tun thlengin an tih dikloh changin ‘mahni
kuanglo nawr’ tiin kan sel mek zawk anih hi.

Tunhnai deuh zawk ah pawh College pakhat, Shree Shankar College, Guwahati anga inzuara Admission fee sang uchuak tak hmanga Mizo zirlaite rawk tumtu te pawh kha a chhuichhuahna kawnga a hnarkaitu chu MZP bawk anni lawmni? MZP in FIR an thehluh hnuah CID leh Mizoram Police pawhin ahma atanga anlo rinhlelh lawk tawh ani tih an puangve chauh ani lawmni kha?

Chumai bakah Mizotawng 8th Scheduled a dah anih veloh chhanah MZP puhin a chhe thei ang berin kan sel bawk. Mahse nguntakin han ngaihtuah teh. Mizo kanla tlem si a, kan tawng hi 8th Scheduled a dah anih chuan India rama hnam changkang ho zingah kan telve ta tihna ani thei ang. Mahse heng Tribal Quota kan neih hi a bo dawn. Plain people te nena inkhaikhin ralah chuan hniamtak kan la ni. Chu chu hrerengin leh thuitak thlirlawkin MZP chuan tunhuna mi sawisel tur pawh dawn changlo lekin kan Mizo hnam thatnan hma anla ani zawk.

Pawisa khawn, extortion, violence, zu heh pawl, etc, kan ti maw? A dik na chen pawh a awm ang chu. Mahse MZP hian dan ang thlapa Mizorama chengte hnenah pawisa an khawn ngailo. Danlo a aruka Mizorama rawn sumdawng, kan ram hausakna drain tuma hmanhlel hote lakah chauh donation a khawn thin. Chutiang hunah chuan thalai tan chuan tharum te pawh hman atul tlat chang a awmve thin asin, ka unau.. Chumai bakah Kristianna chhuanlamin thilthalo an haider ve ngailo bawk. Pawnlam atanga thlir ang ngawt hi alo nilo.

A sei ta viau mai. Mi zawng zawng ka sawmna che u chu heihi ani. MZP hi an chetsual changin a destructive zawngin kan sawisel luai luai thin a, an thiltih thatte leh fak an phuna ah pawh fak tum lovin. An thalo kanti a kan telve peihlo anih pawn a constructive zawngin criticize hram hram ang u.

HMANLAI AN CHANG TA

(He thu ka ziahlai hian engtia ziah tur nge tih ka hrethiam lawk lova. Ka rilrua lut ang angin ka ziak tawp ani)

Ka naupan lai, lehkha ka zirlai kan sawi teh ang. Primary leh Middle School kan kal lai vel te kha ka la hrereng mai. Kan in kha di in diktak mai ala ni (bik) a, mahse ava nuam tak em aw!!!. Kan unauza in school kan kal vek a. Ka nu hian mi meizial a inhlawhin kan chhungkua kha a chawm ani deuh ber e...

Chhuatlaiah khawnvartui bati pakhat kan chhi a, ka nuin mei zial pahin kan unau lehkhazir kha min thutpui thin. Dap chhuatah bati kan bawh hual thap a, ti chuan lehkha kan zirve naw naw zel.. Electric current te kha mi zawng zawng in an neih hnu daih ah kan neive chauh a. Kan in a electric kan neih zan mawlh te kha aw, kan va hlim tlang tak em. A ON na te kha changkang ka tihzia kha. Aw, khang hun te kha ava la reilo tak em!!!

Khatih hunlaia kan retheih lutuk avanga zu kan zawrh teuh zia te kha tunhnu a ka ngaihtuah let leh hian a lo va rapthlak em ka ti. Mihring mithmuhah chuan dinhmun hniam tak ni thin mah ila PATHIAN mitah chuan retheihna hi dinhmun sawi danglamtu alo ni love. A mitah chuan sual ani ve lo.

Tun ngaihtuah chuan khang hun te kha hmanlai an lo chang ve ta reng mai... Ka la ngai dawn mange.

I Chhiar Hi A Awmzia I Hria Em?

Constituency khat mai nilo, District huap mai pawh nilo, a ram pumpui ang huap pawha THAWHCHHUAH aia mamawh ngah zawkte ram, kan Zoramah hian kan nunphung leh khawsazia hi a tha zawng leh rintlak zawnga her rem hi a va han harsa dawn em!! Kan thalaite lah hian thawhchhuah nei hawt silo hian, thil changkang leh mawihnai leh a tunlai hi an hre em em a, chungte lah chu mahni neih engmah awm lawi silo. Mahni n neizo hawt silo hian Maruti 800, cheng nuai chuang fe man chu thing tawh te kan ti vel thul. Kamis manto deuh leina tur leh mahni phone bill takngial pawh nei zolo hian cheng 40000 man bike te chu kan la hmusit ve khanglang lehnghal nen!! Aw...mahni'n nei pha ve uk lo hian mi chuanna tur motor leh mi ta tur Computer leh mobile handset lo hriat changkan puite hi kan intihtheihna te zu nia! Mi ta tur hriat changkan sak ai chuan mahniin neihve tum ila, a va han changkang lehzual dawn em!! I chhiar hi a awmzia i hria em?

Nulate lah hi, an taksa leh fuke an khuhmawina te chu lo dahtha ta ila, an lu ringawt atana an knowledge zauzia te hi aw!! Sahbon dip, diak, tlang, tuiril ho hming an hriat hnemzia te hi! A man chu sawilo mai ila, an mithmul sawisakna chi hrang hrang, a hnawih tialna chi hrang hrang, aaaaaa,....hmui cheina tur hlo leh pencil ang tak te, ka hre seng velo... Hmaihnawih diak, phut, tuiril...nia, sam pawhngilna leh tihkirna nen... A changa sam dum, a changa sen, tial, pawl..chi hrang hrangin.....aww... thawhchhuah neilo mamawh atan chuan a va thahnem em!. An lehkhabu chhiar duh te lah hi, M & B, Crime leh Sex lam rawngkai ziahna....romance.... Film lam pawh chuti tho. Thenkhat lahin Setana biak leh lo lesbian kawi vel te chu changkang nihna emaw an ti bawk. Chutiang tuipuilo leh tive ngailo te chu an la hmu khawlo zaw mah lehnghal.... I chhiar hi a awmzia i hria em?

DARTHLALANG

Chemistry zirtirtu chuan zirlaite hnenah zu fir (alcohol) hlauhawmzia zirtir a duh a, laboratory-ah a hruai ta a. Dawhkanah chuan tui fim (distilled water) tih inziahna bur leh zu fir a chhawp a, chumi bulah chuan changpat pahnih a dah bawk a.

"Bura tuiah hian changpat hi ka thlak ang a, a zirtir chu hrilh ngai lovin in hre nghal thei mai ang" a ti a. Changpat pakhat chu tuifim burah chuan a thlak a, thih a hnekin a harh sawt ta zawk mai a. Changpat pakhat chu zu fir burah chuan a thlak leh a, a tal tawp tawp a, a thi ta mai a.

"Ti khan a zirtir in hria em?" tiin a zawt a. Naupangte chuan, "Aw hria e, zu kan in chuan kan kawchhunga rulhut a thi vek dawn tihna ani!" an ti ta daih mai...

A zirtir:-
Hrilhfiah chiang lova entir leh kawhhmuh ringawt hi tum loh zawk zirtir palh theihna ani

Lest I Forget!!!!

Kum 2007 zet kha chu ka tan kum tha ava ni em... Ka Graduate kum ani a, nupui ka neih kum ani bawk a. Hna thar ka chelh kum ani bawk. Sawitak zelah chuan natna khuma thih ngam deuhthawa hun rei tak ka hman, ka dam leh kum ani tel bawk. Ka tan chuan kum duhawm ber ani hial awm e.

Chumi hnuah 28th October, 2008 zan dar 9:30 ah ka nupuiin fapa duhawm tak min hrinsak a (a pianhlim a hmelchhia ka tih si zia te tak kha aw). Ka tan chuan khawvel hi a par ani ringawt mai...

Mahse kum 2009 erawh ka tan kum vanduai ani vethung. A hmaa vanneihna ka sawi tak zawng zawngte kha vanduaina ah a rawn chang ta!!!... Ka hna atangin ban ka ni a, ka nupui ka hmangaih em em chuan 9th April (ka birthday) ah min boralsan a (ka birthday lawm dantur kan rel dun laite kha aw). Chumi hnu lawkah natna khumah khumbetin hun ka hmang leh ta bawk....

Mahse Engkimtitheia hian kei leh ka fapa hi engtiklai mahin minlo thlahthlam ngai reng renglo. Ka natna min lakkian sak a, hna thar min pe bawk a, hmangaihtu chhungte ka nei a, hmangaih tur fapa ka nei bawk a. Engdang tehlul nge ka la ngaih ang? Ka nupui boral hnu, ka rilru beidawn em em lai, mahni nunna hial pawh lak chak khawpa hun ka hman lai te khan kawng hrang hrangin harsatna min siam thin a. Tun huna Amah ka pan theihna hun hi alo nghak ani tih hi ka hrechhuak tlai lek lek zawk hial ani.
Heti hian Pathian hnenah lawmthu ka sawi thin...

"Lalpa, nang chuan engkimah min hria a, ka nunna min vensak thin avangin ka lawm e. Ka fapa pawh a hmalam hun zawng zawng nang a hretu i ni a, min enkawlsak dawn avangin lawmthu ka hrilh a che. Ka hmangaih ber min laksak avangin ka demlo che a, chumi avanga nunthar min pek zawk avangin lawmthu ka hrilh bawk che ani. A hma khan ka hun i tan ka pe phallo thin a, tunah erawh ka nun ka hlan ta zawk a che. Ka hun hman lehzel turah min vengtu leh enkawltu ni zel ang che" tiin.


NO MATTER HOW MANY YEARS AND TIME PASSES....JENNY, YOU'LL STILL REMAIN IN MY HEART

Corruption Kan Haw Tak Tak Em?

Khawinge post khat manah tun tum chu kumthar te ani bawk a, corruption chungchang hi i han sawiho dawn teh ang u. He thu hi he site ah ngei pawh vawi tamtak khel ani tawhin ka ring a, mahse kumthar atan a vawikhat nan i han sawiho leh teh ang u ….

Corruption han tih hian tamtak chuan kan rilruah pawisa eiruk hi a rawn lang nghalin ka ring. Mahse a awmze dik takah chuan hei ringawt hi ani lo. Keimahni avanga midangin an chanai tur an chan loh te, mahni tihtur tih loh te leh mahni tihloh tur tih te thleng hian corruption huangah chuan a leng vek ani.

Mi tamtak chuan corruption hi kan/an haw tak tak nia ngaih theih turin an ngaihdan an auchhuahpui piap piap thin. Heng ho te hian an haw tak tak lo ka ti ngamlo, mahse corrupt thei dinhmuna dinloh avanga mi corrupt lo sawi chhia tlangaupui ta piap piap hi engzat tak awm ang maw tih hi ngaihtuah tham tak niin ka hria. A tlangpuia lak chu ka ngamlo, mitha leh fel tak tak te hmertel palh a hlauhawm a, amaherawhchu mizo mipui 2/3 zet hi chuan corruption hi kan hawlo niin alang. Kan hriatthiam loh vang te pawh ani mahna.

Zirtirtu i ni a, i hnaa i kal loh fo khan corruption ani. Sorkar hnathawk officer i ni a, i hnuaia hnathawkte office hour piahlama i huan samfai tura i tih khan corruption ani. Doctor i ni a, i duty loh zan anih avanga tlawmngai tura an koh che pawh a i tlawmngaih theihloh tlat avanga nunna hlutak miin an chan chuan i corrupt nasa ani. Layman i ni a, thenawmte ram i nek tung tung fo khan i corrupt ani tih inhria la, kawngpui zauh a tul huna i ram i sah hek tir duh tlat loh pawh khan i corrupt tho ani tih inhria ang che

Nikum kha ka ngaihtuah thin, khati khawp tualthahna leh pawngsual, inpawngnekna a thlen nasat kha kei misual hian ka la hre ngailo.. Ei leh bara harsatna chu sawiloh. Orissa chu drought, tsunami leh thlipuiin a nuai chuan an sual vangah kan puh a, Graham Staines an halhlum vang leh Christian an tihduhdah vangah kan puh a. Kan ram (100% Christian?) a khatiang khawpa thilthalo thleng zozai kha engvangah nge kan puh ve dawn? Vanduai hrim hrim vang maw? Teuhlo. Mitin mai hi kan sual zo tawh a, kan duham luat avanga kan chanai nilo chan kan tum te, kan chapona zozaite avanga Pathian lung kan tihawi loh te, kan thatchhiat lutuk avang te a Pathian min hremna ah ka ngai hmiah mai keichu…. In ngaihdan nive maw…

Keipawh zirtirtu ka ni a, inenfiahna tur tamtak ka nei. Kan zingah pawh hian sorkar hnathawk tamtak in awm ang. Kan zavaiin inenfiah ang u….

INTLAWHKHALHNA

Khawinge, internet khawihve manah blog hi kan siamve reng reng teh ang ka tia, tu nuih kan tiza em lovang chu maw. Mithiam tak tak nia ka lo hriat te hian personal blog anlo nei deuh zel mai a, engngemawti takin suai anei nge ni.

Blog hi engnge a tangkaina tak pawh ka la hrethiam velo. Mahse miin an tih sup sup takah chuan tangkaina chu anei ni ngei tur ania. Ka la hrethiam chho ve zel mai ang chu maw. Helama mithiam ten min finchhuah zel teh un...

Hey, i'm blogging...