Hringnun leh Thihna

“Dimtein kal rawh aw, tah hian ka duhlai chu cham ang a zal a nia”

War Cemetery pakhatah chuan he thu lungchhiatthlak zet mai hi a awm a. Ni e, he leilung hian kan duhlai ngawih ngawihte vut leh vap chu a lo chhekkhawl thin anih hi!!! Thihna hian bawhchhiatni atang tawh khan hringnun hi a sual reng a, inhriatrengna reng awm tawh lohna hmunah nun hi a hnuk liam thin a lo ni

Kan duh reng vang ni lova kan hmangaih tak ten hringnun an herliamsan ni chuan - ‘rihsang mualliam kan la tiam lo’ tiin au lawm lawm mah ila auh kir rual an ni tawh lo. Thenkhat chu an neihchhun, an hmangaih em em leh an innghahna neihchhun liau liau te chu he Thihna kutvawt hian a lo laksak tawh hlawm a. Chutiang hun a lo thlen a mangthana thu hnuhnung sawi a tul chang a - .“Thlamuang takin kal rawh, ka duhlai” han tih dam diai mai te hi keichu khawvela thu sawichhuah har ka tih ber pawl a ni thin

Ni e, kan duhtak, kan hmangaih em em leh kan la thlakhlelh ngawih ngawih ten mual min han liamsan a. Kan pawm nin loh leh kan duat em em laite chu Thihna chuan a hnuaia kun turin min chhuhsak lui a. Tlangval tlawmngaite thlan laihah kan han zalh a, thlan vur zawnga lungnawi leh leiin an thlan thing kuang a zuk den rik te chuan thinlung hi a nghawr dawt dawt a. Thlan vur zawh anih tawh lah chuan a pawng thur ringawt a. Leivung tharlam sen seng sung chuan, “I duhlai chu ka angchhungah ka lem ta” tia chapo hmel takin min rawn hmachhawn a, chutih hunah zet chuan patling dawn hi a tawi tuk tawh mai thin

Hringnun tawp dan chu chuti zawng chu ani a, hringramah hian beiseitur reng reng an awm tawh lo. Anmahni ngaiin lokir leh turin han au thin mah ila khawvel kalphung leh nihphung bawhchhia a he hringrama rawn let leh te zawng rapthlak leh tihbaiawm mai an chang tawh thin

A nih leh Thihna chu anchhia em a lo nih chu le? Keichuan anchhiaah ka puh phal dawn hauhlo. Hringnun par rimtui leh vulmawi lai ber chu Thihna hi a ni zawk!!! Mifingte chuan mihring hian hunpui pathum kan nei tiin an sawi thin. PIANNI, INNEIHNI leh THIHNI te hi. Heng hunpui pathum zingah hian a ropuiber chu Thihni hi a ni. Tu dang vakin an hriatpui loh in i piang thei a, i damchhungin inneihni i tawng miahlo thei bawk. Thihni erawh chu i tawng ngei ngei dawn a, mi tamtakin an hre ngei bawk ang. Chuvangin Thihni hi ni ropui chungchuang a ni!! “Thihna ropuina em em chu chatuan nun nei tur a kailawn, zawh ngei ngei ngai a nihna hi a ni”.

Thihna hi malsawmna a ni tih hi thilmak a ni hran lemlo. Hringnun zinkawngah hian kan hriat leh thiamna te, kan ropui leh theihna miltawk ang zelin mitinin phurrit kan phur theuhva, chu nghawngkawl kan khenthlak theihna awmchhun chu Thihna chauh hi a ni. Thihna lui kan daikai hunah chauh engthawlna kan chang mai dawn a lo ni. Kaltaten ngaiin min au ngai lova, an kalsanate hi a ni lunglenga kur thin zawk ni

William Shakespeare khan Thihna hi Siamtu’n thiam taka a ruat a ni tih a hmuthiam ngawtin ka hre thin. HAMLET thawnthuah khan ti hian a sawichhuah kha, “Khawvela ruang hmasaber kha ruang chhiarsenlohin a zui tawh a, i pa khan a pa a lo sun tawh a, chutianga insun chhawng zel chuan tun hun hi min thlen a ni” tiin a sawichhuak a nih kha. Thihna awm talo se, khawvela mihring piang tawh zawng zawng hi khawvelah la awmin hringnun hi han hmangho vek mai dawn teh ila chuan khawvel hi a buai ve ngawt ang le!!

He hringnuna Siamtu’n themthiam taka Thihna a lo dah hi nun tihlutu, nun timawi a tithlakhlelhawmtu a lo ni a, anchhia awzawng a lo ni love