Wednesday, August 6, 2014

[Ka nupui hian 2009 khan min boralsan tawh a, a hnu ah midang nei leh in tunah fanu kum 1 mi kan nei mek] Ka nupui a boral hlim chuan ka tuar na hle mai. Natna khum a a mut lai khan, "Lalpa, Jenny hi min tihdam sak la, ka damchhungin i rawng ka bawl tawh ang" tiin ka intiam a, mahse a hlawhtling lo. 2009 kum khan Vanah min kalsan ta a, keipawn Pathian rawngbawl ka tum chu ka sim ve nghal hmiah. Hun a inher zel a, nupui dang nei lehin nikum April thla khan a naupai a that loh avangin thihngam hialin a damlo ve leh ta. Ka tawngtai leh a, "Lalpa, Chhungtei hi min tihdam sak la, ka damchhungin i rawng ka bawl tawh ang" tiin. A Kutchak tak chuan min tihdam sak a, kei erawh chuan ka thutiam ka theihnghilh zui ve leh nghal a. Nikum September thla khan keimah ngei ka damlo ve ta. Damdawiin khumah chau tak a tawng peihlo lek a ka mut zawi reng lai chuan ka rilru in ka tawngtai leh a... "Lalpa, min tidam la, ka damchhungin i rawng ka bawl tawh ang". Tunah chuan Pathian tihdamna ka changin in hma a thu post thei turin damna pek ka lo ni leh ta. Mahse kha ka tawngtai hnuhnung ber kha chu ka theihnghilh ngam tawh lo mai ni lovin ka theihnghilh phal tawh lo. Ka damchhungin Lalpa rawngbawl tur a ka intiamna hi ka vawn nun zel theih nan chhiartu zawng zawng ten min lo tawngtaipui theuh turin ka sawm a che u.. WHEN MY END DRAWS NEAR, PRECIOUS LORD, TAKE MY HAND...


Monday, July 1, 2013

Lalbiakhlua Renthlei wants to be your friend on Google Latitude

Google Maps Mobile logo
You have been sent a friend request by Lalbiakhlua Renthlei on Google Latitude
Latitude lets you share your location with friends and view their locations on your phone or computer. Click Start Using Google Latitude to see the friend request.

Wednesday, March 28, 2012

INSUAL

'A thupui teh tawp chuh' i lo ti a nih pawhin a mawh love. Mahse insual hi Mizo nun a bet ve reng emaw tih theih tur khawpin Mizote hian kan hrat si a nih hi. A thatna sawi tur lah chu ka han hrelo khawp a, mahse insual hrat tawh na laileng ho hi chuan an sim thei ta tlat thin si lo hi thilmak tak niin ka hria. Keima chanchin kan sawi lawk teh ang.


Keipawh hi Middle School ka kal lai vel kha ka insual tam ber lai niin ka hria. A mak khawp mai, a hunlai na na na kha chuan a lo nuam a ni ang e. Nitin khan kan insual thin a, zirtirtute hrem leh vuak pawh ka tawrh phah nasa khawp mai. Thiante khan tu nen emaw min han chotuah a, minlo ngam ve chuan, "bânah bûng bulah lo awm rawh" kan han ti ngei a. Kan han insual a, kan second te khan kan chak lo palh a nih pawhin min pui ngai chuang lo. Khatia fair tak mai a mipa leh mipa, inngam leh inngam kan han in street-fight tak tak thin kha chuan thaza tir tan chuan a lo nuam ve em a ni. A tukah kan kut na lo pui te kha bandage in kan han tuam a, ka biang leh mitko te pawh band-aid kan han bel ngei bawk a. Khatia school kan kal kha chuan hmeichhe ho hian pa min ti hliah hliah hian kan in hre thin. Pa min lo ti tak ang maw....


Tumkhat chu kan thianpa insual hi kan second ve thung a lawm mawle. A khingpui tur kha amah aia te zawk a nih avangin kan huphurhpui lo nasa mai a. Mahse.....an han tan ta a le, rin ang a lo ni hauh lo. Kan thianpa khan a hneh ta hauh lo mai a, a te zawk khan a bawhbet a, a hnek ta hrep mai. "Kan tlawm e" kan ti ta ngawt a, chu pa te reuh chuan thawh pah in vawihnih a han hnek leh hram a, khatiang leh kher kher kha ka thin in a tei thei thak lo. Chak in ti taka an haw thla chu lungtum lian tha lenglawngin a hnungzang ah tak ka zu den a le, a pai nawk mai a. Tlaiah ka pate nen an in ah ngaihdam kan va dil ta a nih kha. Kar khat vel zet school a rawn kal theilo lehnghal. Ka la hrereng mai.


Ka tlangval chhuah tak tak hnu, High School ka rah hnu ah erawh chuan vawikhat mah ka insual leh ta lo. A hma kha zawng a insual hrat em em, ka sim chiang ta lutuk kha ka han ngaihtuah let vang vang hian a chhan pakhat chauh awm in ka hria. Ka u khan min zilh thin a, "Lalmam, helai Bible chang hi chhiar teh" min ti a. Ka chhiar duh lawk lova, a hnu daih a ka han chhiar nak chuan heti hian lo zu inziak a mawle----


"Intihbuaina ata lo inthiarfihlim hi thil duhawm a ni a, Mi â apiangte chu an insual thin." (Thufingte 20:3)


Helai thu ka han chhiar chu ka var kawk in ka hria. Kha tih lai khan ka la piangthar hran lo na a keimah ah insual lo zahthlak zia leh mi â te tihawm tawk leh anih zia kha a chiang nghal em em mai a. Tunhma angin a tul hun riau ka tawng ta ngailo bawk nen, hei ka sim ta hlauh mai.
Mihring hi Setana hian a lo bei nasa thin khawp a, min beihna tamtak hi chu Sehtea hnathawh a ni tih hriat loh khawp hian a inthup thiam a ni. Chapona riau kan nei a nih chuan a bakah chungnungber ni a inhriatna thlarau min rawn pe vat mai a ni. Rinhlelhna riau kan nei a nih chuan rinawmlohna thlarau a rawn tuh nghal vat a, huat zawng riau kan nei a nih phei chuan rang lutuk in tharum thawh duhna thlarau min rawn pe nghal mai zel. Chutak chu mihring in kan hriatthiam tak loh thin chu a ni. Tlangval thazat lai phei chuan weak-point tam tak kan nei a ni tih hriat a tha. Hriat mai bakah chung kan weak-point te chu eng eng nge a nih tih pawh kan hriat a ngai a, kan hrechhuak theilo a nih chuan mi hmantlak ah kan chawrchhuak thei ngai lovang.


Chakna kan neih te hi midangte nekna tur atan a ni lova, huaisenna kan neih te pawh midangte tiralti zawng a hmang tur kan ni love. Chak leh huaisen ni a i inhria a nih chuan thil lawmawm a ni a, chapopui atan leh mi chaklo te hnuaichhiah nan a i hmang a nih erawh chuan a petu che i tilawm hauh lovang le.


CHAKNA NI LOVIN, THILTIHTHEIHNA NI HEK LOVIN, KA THLARAU ZAWKIN LE....

Monday, March 12, 2012

KA LEI HRINGNUN

He hringnun hian thil min va zirtir tam tawh tak em!! Lungngai chunga hlim dan te, tap chunga nuih dan te, beidawnna ruam thuk tak atanga beiseina meichher chhem alh dan te, natna khuma thihngam lu pu a mu chunga damna famkim neih dan te, rethei chunga hausak dan te... A tam lutuk. Mahse ka zirthiam thei chuang lo.

"Pathian hian mitin hma ah vanduaina leh vanneihna a dah" an lo tih thin hi a taka tawng tu ni ve in ka in hre thin a. He ka nun khawhar leh chau tak hian a chang chuan thu leh hla min pe thin a, a chang in tahna, a chang leh hlimna min pe thin. Ka hringnun a ka thil tawn thin te hi keima thawhrah vek ani tih ka hriatin ka hlim thin a, chutih laiin ka duhloh zawng tak tuhrah ka seng chang erawh chuan ka tap si thin.

Vanduaina ka tawn chang chuan "Lalpa, engtizia nge?" ka ti thin a, vanneih niah erawh ka thawhrah ve ni ah ka lo ngai thin. Nunruak leh tuihal huam huama ka awm chang a tam a, hlimna ka tawn chang erawh kutzungtang thliaka chhiar tham lek a la ni si.

Ka kalkawng tluan mai hian hlingbawn hmun ni a hriat chang ka nei thin a, ka ke pen tin maiah hian hlingzumin min chhun thin a hriat chang ka nei thin. La kiang tura Pathian auh ka tum nasat zawh poh leh ka kha a chih leh thin a, ka rilru pawh a nilo lamah hruaiin a awm bawk thin. Hmangaihna an sawi thin hi engnge a nih ka hrethiam lova, hrethiam turin ka la inpeih hek lo.

"Engah mah mangang suh u; engkimah tawngtai leh dilin, lawmthu hril tel zelin, in duhnate chu Pathian hnenah hriattirin awm zawk rawh se."
(Philipi 4:6)
...
Helai thu hian keimah ah awmzia a neiin ka lo hre ngai lova, engah mah mangang lo tur a min hrilhtu hian engvangin nge MANGANNA
hi a lo siam kher ang le tiin ka ngaihtuah thin.

Pathian hnenah dawhtheihna te, thuhnuairawlhna te, hausakna te, inngaihtlawmna te, chakna leh ropuina te leh thildang tam tak ka lo dil thin a, mahse heng zawng zawng te hi a pek a inpek ni lovin hlawh chhuah tur vek an lo ni tih ka va hrechhuak har em!!

Buaina, harsatna leh manganna ka tawn zawng zawng lak atang te hian Pathian hnenah ka lo vui thin a, nimahsela heng harsatna te hian he khawvel nunrawng tak lak atang hian min la hrangin A hnen lam a min hnukhnaitu tur a A remruat sa a lo ni reng si a....

KA FAK A CHE LALPA; I KAWNG MIN THLANSAK HI A VA MAK EM!!!!