KEIMAH EM NI?

Matthaia 26:20-22 kan chhiar chuan, Lal Isua leh a zirtirten Kalhlen Kût chaw an kilho laiin Isua'n a zirtirte mak tih kumkhua tur thu rawn sawi phutin, "Tih takmeuhin ka hrilh a che u, in zinga mi pakhat hian mi mantir ang" a han ti phut mai a!!!

Chu thu thinthawng chuan a han den chiah chuan, a sur a sa hnuaia an lo zui, a thim a var pawh thlulo leh hrehawm tinreng an lo tawrh phah tawhna an hotupa, a thiltihtheihzia lah an hriat chian em emin chu thu a han sawi ta mai chu an tan chuan a mak a, awih har tak anih rualin awihloh theihloh a ni bawk si. Puitling ta nafam chuan phatsantu dinhmuna din chauh loh chuan mahni hotupa mantir ngawt chu thil theihah ruat lovin leh a tua ber nge tih an hotupa chuan a sawi lan bawk si loh avangin mangang takin, "Lalpa, keimah em ni?" tiin an zawt ta theuh anih kha.

Khawtlang leh inthenawm khawvenna ah pawh a ni tho. Thenawmte kherlo pawh inchhungkhura buaina a lo chhuah chang te pawh hian mahni thiamlohna hmuh a har hle thin. Khawtlang hruaitute leh thenawm khawvengte kher ran a, kawng thenkhata an hlawhchham hnu pawh a kawng lehlama la beih fat fat chingte hi inchhungkhur, kohhran, khawtlang leh thenawm khawvengah pawh ngêt siamtu an ni fo thin a, chumi chu, "Keimah em ni?" i han in ti phawt teh ang. Mahni inhmuh kim hi a har khawp a, darthlalang lian i inchhawp law law teh ang aw.

Inchhungkhur leh khawtlangah chauh nilo, pawlho ah pawh mite hmuh tlinloh ching dawklak ho hi chuan anmahni bak hi tling leh felah an inruat thei thin lo. An zuam zawngte dinhmun an it deuh phei chuan karfung hrang hrang ruaiin kar phawn ngei tumin mi phenah tan an la nasa thei thin khawp mai. An tlawn zawng leh an laka tlaktlum an duhna zawngah chuan zah pawh dawn eih lovin an che leh hreh hauh lo. An duhsak zawngte vawrh lansarh an thiamdan leh, chumi let leh lam chu lamtang ngahna ani tih hmu pha reng chunga che vak chi a la awm leh theih a. Chung mi te pawh chu, "Keimah em ni?" i la ti zel teh ang.

Thiam taka rorelnaah lamtang siam a, lang mang si lova mahni tânghma hai thiam riau leh mite dah offside thiam riau, tuna mite thinlung thiamtak mai a chawk nu a, nakina an hriatthiam hnua a nih nih lo ni zo tawh tur si ang zawnga hma la chite pawh hi mihringah hian a awm leh theih a. "Miin i chunga an tih a in duh tur ang bawkin mi chungah pawh tive rawh u" tih thu erawh hi chu ama tan a lalut ngailo thung. Chumi pawh chu, "Keimah em ni?" i la ti chhunzawm zel teh ang.

Tha, felfai leh dik kan duh a. Kan han sawitak leh a dang tamtak, ni thlup ang a lang, mahse a nihna takah chuan Moral Corruption hlauhawm tak ni si lak atanga kan fihlim a hun a, thil diklo palh a lo awm pawh a, "Keima thiamloh a ni, keimah zawk hi alawm" kan tih a, thiamlo nih kan inchuh nak nak hunah thiltha chu amahin a lo piang tawh ang. Chu thil chu zawlneite hrilhlawk kher ngai lovin kan banphak maiah hian a awm a, kan hmu pha reng nghe nghe a ni. A lo inherchhuahna daltu a la awm thei cheu mai!!! Chu a kawngdaltu chu "Keimah em ni?" tiin i inbihchiang theuh ang u.

ENGNGE HLAUH TUR?

Hlauh nei miahlo leh ngamloh nei miahlo mihring chu an awm awm love. Amaherawhchu ngam zawng leh hlauh zawng chu a dang thei viau ang. Pawngvina pawh khan a nupui chu a hlau hle in an sawi thin kha. Pasaltha huaisen, ramsa kawlh leh ral hlauhawm hma a zam ngailo te pawh hian min tina thei lemlova kan ngaih pangang, sazu no mit keu... tih vel mai mai pawh hi hlauh taktein an hlau thei tlat nia

Hlauh hi a tangkai chang a awm theiin, kan hlauh a zirin kan mizia pawh thui tak a hriat theih awm e.

Hnam mawl apiang hi tihthaih an nuamin, an hlauhna avangin thunun pawh an nuam thin. Hlauh tur ani nge nilo fiah lemlova mi sawi apiang hlau thei viau mi hi a awm theih khawp a, hetiang mi te hi dawihzep kan tihte chu anni mai lawmni? Mahniin fiah leh tih tum lemlova mite sawi lam apianga thle kual mai mai hi tunlaiah pawh kan nitin nunphung hrim hrimah leh kan rinna kawngah pawh kan tam thei viau dawnin ka hria

Mizote pawh hi engngemaw chenah kan intichangkangin, fin leh varna kawngah pawh kan indahsang viau a. Amaherawhchu tihthaih kan la nuam riau in ka hre thin. Mi sawi hlauhawm apiang hi hlauh tur emaw kan ti niin a lang. Hmanni lawkah Nostradamus-a hrilhlawkna in mi tamtak a tibuai a, chumi hnuah NIBIRU kan buaipui leh luih luih anih kha. Mi thenkhat hlauhna nei ve lova thlamuang taka awm te chu mawl kan la ti viau lehnghal

Chutiang bawkin Bible Society leh Census hlau reng reng in mi thenkhat an lo hmanhlel a. European Union leh khawchhak lungpui hlau em em lah bo lo. Heng ang hlau a phar phar ho hi zawt ila an hlauh chhan ber hi an hria ang em aw ka ti thin. Kan hlauh tur hriat zawh zai dan em em hi engatinge ni ang aw? Kan Christianna kum za kan lawm tawh hnu ah pawh heti reng reng mai hi chu Christian diktak awmdan tur ani ang em aw!!!

Paula ten, "Pathianin hlauhna thlarau min pe lova, huaisenna leh thiltihtheihna thlarau min pe" an tih lawm lawm laia mi sawi hlauhawm apiang a-dik-a-dawk pawh thlu lova hlauh ngawt zel mai hi kan dawihzia leh kan tak loh zia tarlanna chauh ni mai hian ka hre thin.

Kan thil hlauh hian min thunun tlat a, India dan a misual hremna a nat avangin thilsual kan ti ngam lova, nu leh pa kan hlauh leh kan zah avangin an mithmuhah thilsual kan ti ngamlo thin ani. Kan hlauh zawng tak chuan thildang min ngaihtuahtir theilo fo. Kan piputen an sawi thin kha, "sairamchhuah a sai hlaua tlanchhiat chuan sakei te mai mai chu kan palthle lawl lawl mai ani". Kan thil hlauh hian min thunun tlat avangin hlauh tur diktak kan hriat a pawimawh hle ani.

Pathian hi kan hlauh tur diktak chu a lo ni e. Pathian hlau han tih hian zah leh tih a kawk tel ani tih pawh hre tel ta bawk ila. Kan insawi anga Pathian hlau tak tak ni ila chuan tuman European Union, khawchhak lungpui..etc..te hi kan hlau lek lovang a, corruption, tualthah leh inrawk tih tawngkam te hi kan hre kher awm love. Pathian aia changkanloh kan hlauhna te, Pathian aia retheih luat kan hlauhnate hian eng sual kawng nge min zawhtir a, eng pawi nge kan khawih thin tihte hi i ngaihtuah fo thin ang u